Papritur, pa dëshirën e saj, nën duart i tingëlloi ajo kënga e dashurisë ngadhënjyese, që
dikur i kish rënë për të Muçio dhe, po në atë çast, për herë të parë pas martesës, ajo ndjeu
brenda vetes drithërimën e një jete të re që po lindte…
Nga ëmbëlsia e një vere në fshatin rus në gjysmën e parë të shekullit të 19-të deri te
atmosfera e errët e intrigave dhe magjisë së oborrit të Ferrarës në kohën e Ariostos. Dashuria
e pafajshme e Vladimirit të ri për Zinaidën e bukur dhe magjepsëse, e cila në sytë e saj prej
adoleshenteje mishëron idealin e femrës së përjetshme; pasioni i trazuar i Muçios, i cili falë
magjisë së zezë të mësuar në Lindje, dëshiron të rrëmbejë nga burri i saj Fabio, Valerian, e
cila ia ka refuzuar dashurinë. Historia e dy dashurive të vështira dhe të pamundura, por edhe
një analizë e dashurisë e përjetuar si një ëndërr, si keqardhje dhe gjithashtu si një mjet
stërvitjeje dhe i pasionit të shfrenuar që nuk ndalet para asgjëje për të arritur qëllimin e tij.
“Asja” – lot për dashurinë e pashpërblyer
Në Gjermani, rrëfimtari takon një çift të çuditshëm, Gagin dhe motrën e tij Asja… Apo është
motra? Tregimtari dhe Asja tërhiqen nga njëri-tjetri, por nuk janë të destinuar të jenë bashkë.
Nuk ka dyshim që mjeshtri i penës Turgeniev ishte një shpirt i ndjeshëm. Po ashtu, kuptohet
qartazi se gratë e trilluara të Turgenievit janë personazhe të thella dhe të zhvilluara mirë,
përvojat e të cilave përshkojnë gamën e plotë, ndjenjat e të cilave janë reale dhe, më e
rëndësishmja, morali i të cilave është më i fortë se ato të homologëve të tyre meshkuj. Nuk ka
shumë funde të lumtura në letërsinë ruse dhe akoma më pak histori të lumtura dashurie.